Kryeministri në detyrë, Albin Kurti, ka komentuar verdiktin e Gjykatës Kushtetuese, e cila ka konstatuar se Kuvendi nuk është konstituuar.

Sipas tij, është humbje kohe dhe dëm që Kuvendi i Kosovës nuk po funksionon, ndërsa duhet të vazhdojë punën.

“Konsideroj që është humbje kohe dhe dëm që nuk po funksionon Kuvendi i Kosovës. Kuvendi e ka zgjedhur kryetarin, Dimal Bashën, i ka zgjedhur katër nënkryetarët, Albulena Haxhiun, Vlora Çitakun, Kujtim Shalën dhe Emilja Rexhepin, askush nuk është duke e zënë karrigen e zbrazët për nënkryetarin nga komuniteti serb. Është dashur që të vazhdojë puna e Kuvendit sepse shteti i Kosovës nuk ka kohë për të humbur”, ka thënë Kurti.

Ai ka bërë të ditur se Gjykata Kushtetuese nuk mund të anulojë votimin për Emilja Rexhepin.

“Emilja Rexhepi është nënkryetare e Kuvendit, nuk mundet votimi për Emilja Rexhepin të anulohet. Prandaj ne kemi ngelur vetëm te nënkryetari i fundit nga komuniteti serb. Por mos harroni, nuk janë serbë vetëm ata të Listës Serbe, serb është edhe Nenad Rashiq”, ka deklaruar ai, duke kritikuar “opozitën” që nuk e ka votuar Rashiqin për nënkryetar të Kuvendit.

“Në njërën anë përfaqësuesi i Listës Serbe i mori vetëm 10 vota, e Nenad Rashiq 56. Vetëm pesë vota t’ia jepnin këta 52 që janë të opozitës, sot nuk ishim duke i bërë këto pyetje dhe këto përgjigje”, ka shtuar Kurti.